Joriy yilning 28-avgust kuni Xitoy Xalq Respublikasining Pekin shahrida O‘zbekiston-Xitoy savdo, iqtisodiyot va investitsiya forumi tashkil etildi. Mazkur tadbirda ikki mamlakatning tegishli davlat idoralari, biznes doiralari hamda yirik kompaniyalarining 800 dan ortiq vakillari ishtirok etdi.

Forumda O‘zbekiston delegatsiyasiga O‘zbekiston Respublikasi Bosh vazirining o‘rinbosari Jamshid Xodjayev, Xitoy tomoniga esa Xitoy Xalq Respublikasi xalqaro savdoni rag‘batlantirish kengashi raisi o‘rinbosari Li Qinshua rahbarlik qildi.

Shuningdek, forum doirasida Xorijiy investitsiyalarni jalb etish agentligi direktor v.b. Mansurjon Rasulev O‘zbekistondagi investitsiyaviy muhitga bag‘ishlangan taqdimot bilan chiqdi. Taqdimot davomida Xitoy bilan amalga oshirilayotgan muvaffaqiyatli qo‘shma loyihalarni alohida qayd etilib, mamlakatimizda energetika, raqamli texnologiyalar davlat xususiy sheriklik va xususiylashtirish sohalaridagi mavjud imkoniyatlar va istiqbolli loyiha takliflari haqida batafsil ma’lumot berildi.

Mazkur tadbir doirasida sog‘liqni saqlash, qishloq xo‘jaligi, to‘qimachilik, qurilish materiallari, suv xo‘jaligi temir yo‘l sohalarida qo‘shma loyihalarni amalga oshirishga oid 23 ta hujjatlar almashish marosimi bo‘lib o‘tdi.

Forum G2B va B2B uchrashuvlari bilan yakunlandi.